Zen Küttner komme von auswarts rah
viel Arbiter mit dr Eisenbah.
Doß die sich zr Zeit in dr Sähm stelln ei,
müssn se im fünfe schie ofn Bahnhuf sei.
De Friehschicht, die is fei intressant,
do passiert namlich egal allerhand.
Ungewaschn kam die aane ofn Bahnhuf ah,
de Haar net gekämmt un `s Klaad verkehrt ah,
in Zug drinne soß se wie drschlogn.
"Aber heit musst iech renne!" tat se klogn.
"Un hätt dr Nachbar net Radau gemacht,
do wär iech fei noch net drwacht!"
Ene annere hatt´ siech ganz überlegt
ihrn Azug ohmd ofn Schrankel gelegt,
damit se früh ihr bissel Staat,
wenn´s spät war, bei dr Hand geleich hatt.
Wie se dacht, su warsch wurn,
se log noch in Bett, kann dr Zug gefahrn.
Doch die, die war do ganz verwugn,
dr Mantel wur geleich übern Schlüpfer gezugn.
Von Schrankel wur `s bissel Zeig waggenumme,
un glicklich is se zun Zug noch komme.
Doch wie se siech of dr Plattform besieht,
hatt se ne Azug mitsamt dr Schrankeldeck miet.
Un off dar Deck, do log ganz steif
von ihrn Vater drham de Tobakspfeif!

Mit dan Gedanken: hoffentlich verschlof iech `s morgen net,
ginne zr Friehschicht alle "Zugmaad" ze Bett.
Un weckt´s en dr Nacht mol unverhofft auf,
reißt en de Angst ausn Bett geleich raus.
Do hatt vor kurzen e Neidarfer Fraa
off dr Viernstroß dr Nacht a Lichtl gesaah.
Dr Zug!! Denkt se, du Ugemoch du!!
Halb ahgezugn rennt se zun Bahnhuf zu.
Doch unnerwags, do trifft se fei
en von dr Neidarfer Polizei.
Ofn Dorf, do is doch niemand per Sie:
"Gutn Morgn", saht dar, "wu willst dä du hie?"
"Sieh när eham, `s hot doch arscht zwee geschlogn!“

Gefahrlich is de Friehschicht zr Winterszeit,
wenn´s auftaat, gefriert un e bissel drauf schneit.
Do mecht mr, wenn mr zun Zug muß renne,
siech alle Regeln dr Kunst ahgewähne.
Do is voring Winter aus unnern Ort
e Maad ziemlich spät von drham arscht fort.
Doch wie se of dr Stroß kimmt raus,
zschinnert se amol übersch annere aus.
E ganze Weile wur dos mietgemacht,
doch dr Zug hot se ah aus dr Fassing gebracht.
Domit se is noch ofn Bahnhuf komme,
wurn afach de Schuh unnern Arm genomme.

Hot mr nu frieh en setten Wettlauf gemacht,
is mr ne ganzen Tog tichtig aufgebracht.
Do setzt mr siech, wenn de Fabrik is aus,
bis dr Zug kimmt, ofn Bahnhuf naus.
Doch wenn mr of dan Sähmer Bahnhuf kimmt,
es Wartezimmer oft verschlossen find.
Do hom siech zwee Maad ganz ubedacht
nei in dos Fahrkartenzwicker-Heisl gemacht.
När wenig Minuten hattn se Platz genomme,
tat ah schie dar rute Mützenmaa komme.
Von weit´n hot dar siech fir dos Personal intressiert,
vor die ganzn Zugmaad hot er die zwee blamiert.

Su verginne nu kaane Stunden un Wochen,
wu en net tut `s Harz darb pochen.
Doch aller Schrack gieht fix verbei,
un de Zugmaad bleib´n dr Firma trei!!